Inin Maestriah ipan Totlahtol iwan Tonemilis (MTT), amo san ihkon oneski. Miak tlamantli omochih achto ipan tlamachtiloyan Universidad Veracruzana iwan Universidad Veracruzana Intercultural (UVI), tlen kichikawaltisneki tonawatlahtol. Nochi tlen omochih okipalewih pampa ma mochikawaltihtiwallah nawatl. Ihkon oahsik tonalli keman yi nelli kualtis yetos se maestriah ika nawatl. Inin tlamachtiloyan, yeh tlen opehki kitemaka tlatlamantli tlamachtilis ika nawatlahtol. Achto opehki ipan Facultad de Antropología, ipan xiwitl 70meh. Niman, ipan 90meh, ipan Escuela para Estudiantes Extranjeros, iwan niman ipan Centros de Idiomas. Axan, yeh UVI kitemakatokeh nawatlamachtilistli noihki.
Inin UVI, oneski ipan 2005, keman opehki mochiwah tlamachtiloyahmeh tlen itoka “interculturales” nikan Mexihko, ihkuak opehki xiwilpilli 20. Inin tlamachtiloyahmeh kitemaka miak tlamantli ixtlamachilistli ipan weyi tlamachtihkayotl, tlen kiseliah masewalaltepemeh. UVI oneski ihtik Universidad Veracruzana, kemin se tekitl tlen kichihtoka yeh Instituto de Investigaciones en Educación (IIE) tlen ika kitemakasnekiaya tlamachtilistli tlen melahka ma kinipanitta masewalmeh. Ihkon, inin tlamachtiloyan UVI okinek okinpalewih nawi masewaltlalmeh tlen killiah “regiones itnerculturales” tlen powi Veracruz: Wextekapan tlalli, Totonakapan, Wehweyih tepemeh iwan Selvas. UVI noihki kipia se kalli ompa Xalapa, tlen omoskaltih iwan axan yeh kahki se weyi tlamachtiloyan tlen powi UV.
Miak tlamantli owalkiski itech nochi inin tekitl (xikitta Bernal, 2017: 1-16), ihkon okualtih ma yeto tekipanolistli ipan tlamachtilistli, tlamachtilnehnekilistli, amatlahtolkuepalistli, kamatlahtolkuepalistli, tlatamachiwalistli, altepechanehkayotl, iwan miak okseki tlamantli. Seki tlamantli tlen omochih, yeh tlen nikan motekpana:
| a) Nawatlahtoltlamachtilistli |
| b) Tlamachtihkeh kinehnekih nawatl ihtik tlamachtihkan, keman tlamachtia, keman kichiwah tlatemolistli iwan keman tekipanowah inawak masewalaltepemeh. |
| c) Nawatlahtolli monextia ipan tepamitl, kalmeh iwan ohtli tlen powih UVI |
| d) Olocholismeh ika nawatl kanin tlamachtihkeh iwan momachtihkeh monechikowah iwan tlahtowah nawatl, kinteixpantiah amoxmeh iwan tlayehyekowah ika nawatl. |
| e) Kamatlahtolkuepalistli (ipan ixtlamachilolocholismeh, keman moteixpantiah tesis) |
| f) Amatlahtolkuepalistli pampa amoxmeh iwan oksekimeh tlanehnekilwan ma yetokan ika nawatl. |
| g) Tlahkuilolistli ika nawatl (momachtihkeh iwan tlamachtihkeh kimachiotiah intekipanol ika nawatl) |
| h) Tlamachtilnehnekilistli ika nawatl |
| i) Xochitlahtolchiwalistli iwan amoxchiwalistli |
| j) Tlamachtilchiwalistli (diplomadoh, seminarioh iwan oksekimeh tlamachtilmeh) |
| k) Nawatlahtoltamachiwalistli |
| l) Tlamachtiloyah nechikolismeh (Festival de la palabra, Foro de Lenguas Maternas por el Mundo, Foros de Investigación Vinculada) |
| m) Nawatlahtolnechikolistli kanin timotlapowiah nawatlahtohkeh akinmeh tiwalewah nowian |
| n) Tlatemolistli ipan nawatlahtolli (tlahtolyolitilistli, tlamachtilistli, tepantlahtolistli, tlahtolkuepalistli, altepetlahtoltlachialistli, tlanehnekilmeh, etc.) |
| o) Yolyemanilistli ika teposmeh TICs |
| p) Tlahtolteixpantilistli ipan oksekimeh wehka tlalli kemin Northeastern Nahuatl Conference de la Yale University, nechikolistli Nahuatl Across Borders ompa University of California in San Diego iwan Congreso Internacional sobre Revitalización de Lenguas Indígenas y Minorizadas ompa Universidad de Barcelona, Universidad de Indiana iwan Universidad de Vic-Universidad Central de Cataluña. |
Nochi inon tlen omochihtiwallah ipan UV, kichikawaltia inin maestriah, kemin tlamachtilistli tlen yi nelli miak ipati. Inin tlamachtiloyan yi kitemaka miak ixtlamachtilistli ipan licenciaturah. Ihkon, inin maestriah kinselis momachtihkeh akinmeh otlankeh ilicenciaturah nikan UVI, maski noihki kinselis nochtin nawatlahtohkeh profesionistah akinmeh kineki kichikawaltiskeh itlahtolixtlamachilis.
