PEWALISTLI​

Ni nawatlahtolli iwikal ken sekinokeh tlahtolmeh, santlawel mopatla kemah motlahpalowah wan kemah monawatiah o momakawah. Ni tlamantli pano pampa amo iwikal ken motlapowia o mokamawia ipan se tlalli wan ipan seyok tlalli. Ma tikitakah se neskayotl, ipan sekih altepemeh tlen Wextekapan tlalli, kemah motlahpalowah kitekiwiah tlahtolli “tonalti”, ni tlahtolli kihtosneki “kualli tonal”, tlahtolli “tiotlakilti”, kitekiwiah kemah tiotlahka, wan kiihtosneki “kualli tiotlak”, wan tlahtolli “tlapoyawalti” kitekiwiah tlayowa wan kiihtosneki “kualli yowalli”, san pampa, ipan nochi wextekapan tlalli santlawel motekiwia tlahpalolli “piyali”, ni tlahtolli kiihtosneki kehwak towampoh o toyolikni tlen tihtlahpalowah “ma kipia se tlamantli tlen kualli”, ni tihkuamachiliah kehwak “ma kipia kualli inemilis o ma kipia se kualli tonalli”. Kemah monawatiah o momakawah kitekiwiah ni tlahtolmeh: “timoitasehyok” kiihtosneki “teipah timoitsaseh” seyok tlahtolli tlen nohkia motekiwia eli “timopantisehyok”, ni tlahtolli kiihtosneki “teipah mopantiseh”.

Ipan tepemeh tlen Zongolica, onkah sekinokeh tlahtolmeh tlen kitekiwiah kemah motlahpalowah, ipan nochi ni tepehmeh santlawel motekiwia tlahpalolli “panolti”, sekih masewalmeh tlen mochantihtokeh o chanchiwah ipan ni tlalli, kiihtowah ni tlahtolli motekiwia kemah mopantiah ipan se ohtli, ni tlahpalolli moketiwia ipan tlen welli kawitl ipan se tonalli, kikuamachilia kehwak kiihtosneki “ximopanolti o nipanotia”. Seyok tlahtolli tlen nohkia santlawel motekiwia eli “chikawatika”, sekih kiihtowah ika ni tlahtolli se kineki ma nopa seyoh masewalli “ma kipia chikawalistli” o kemah tihyektlaliah totlahtol, nohkia tiweliseh tikihtoseh “ma nemi ika chikawalistli o ma itzto (yeto) ika chikawalistli”.​ Namah (axkan) tihnextiah tlapowalismeh (kamanalli) kampa mokaki kenihki motlahpalowah wan momakawah ika nawatl tlen Wextekapan wan tlen tepemeh tlen Zongolica.